TACLOBAN CITY – Kalungkagong ha presuhan an usa nga suspek, mahuman ine nga makuhaan in illegal nga droga ngan bala ha usa nga checkpoint ha Brgy. Bawod, San Isidro, Leyte.
Ginkilala an suspek nga hi alyas Mer, 36 anyos, nga residente han Brgy Paril, San Isidro, Leyte.
Sumala kan PMAJ. Reymond Quinagutan, Chief of Police San Isidro Municipal Police Station, subay ha panhitabo, ginsitar nira an nasabi nga motorista matungod nga waray ine sul-ot nga helmet, ngan waray gihapon plate number an gamit hine nga motor.
Han pagprobar nga kuhaon hiton suspetsado an iya driver’s license, tigda la nga nahulog an usa nga bala hin pusil.
Dayon naman nga gin-aresto han mga kapulisan an nasabi nga suspek, matungod nga waray ine naipakita nga mga kaangayan nga dokumento, nga nagtutugot magdara hiya hin bala hiton pusil.
Mababaruan, labot la ha bala hiton pusil, nakuha gihapon ha posisyon han suspek an usa nga sachet hitn gintutuohan nga shabu.
Ha pagakayana, aada ha kostudiya han mga kapulisan, an tanan nga ebidensya nga nakuha ala kontra ha suspek, ngan matubang ine ha kaso nga pagtalapas hiton RA 9165 o an Comprehensive Dangerous Drugs Act of 2002 ngan RA 10591 Comprehensive Firearms and Ammunition Regulation Act.
