Igin buyagyag ni Senate Blue Ribbon Committee chairperson Panfilo “Ping” Lacson nga gin iimbestigahan niya an paggamit han mga flood control ngan iba pa nga infrastracture projects han Department of Public Works and Highways kumo kabalyo ha kumpirmasyon ni anay Sec. Manuel Bonoan kumo sekretarya han ahensya ha Commission on Appointments hadton 2022.
Dugang pa han senador, usa ha mga pinakainteresado nga impormasyon nga lumutaw ha ira imbestigasyon in an paggamit han mga proyekto ha insentibo ha panahon han pagdungog han Commission on Appointments para ha kumpirmasyon ni Bonoan.
Ginmalatumat ni Lacson nga tikang kan anay DPWH Usec. Roberto Bernardo an impormasyon kun diin nagpatapod hi Bonoan hin purluminos P500 milyon nga kantidad hin mga proyekto han DPWH ha usa nga membro ha CA tikang ha Kamara.
Dugang pa, ginmalatumat han nasabi ng membro nga iginpanhatag niya an proyekto ha iya mga kupod pero pag-iha in nagreklamo daw an pira ha mga ini mahitungod nga waray naman nakarawat nga proyekto.
Samtang, nagawas gihapon ha imbestigasyon ha nasabi nga panahon, an CA ha Committee on Public Works and Highways an nagkumpirma ha ad interim appointment ni Bonoan ngan ginmamanguluhan han anay tinaglawas han SAGIP Party list ngan yana in senador nga hi Senator Rodante Marcoleta, nga kilala naman nga kritiko ni Lacson ha paagi han pagkapot han Blue Ribbon Committe ha imbestigasyon ha mga anomaliya ha flood control projects.
Samtang, ginpahayag ni Lacson nga padayon pa an beripikasyon ha nasabi nga impormasyon, kaupod an panginano ha mga record nga iginhatag ni Bernardo agud matudlok kun mayda kamatuuran an listahan han mga proyekto nga daw ginamit kumo kabalyo han kumpirmasyon ni Bonoan.
