Nagpagawas hin precautionary hold departure order (PHDO) an Branch 52 han Manila Regional Trial Court (RTC) kontra kan Senador Jinggoy Ejercito Estrada ngan pira nga anay opisyal han Department of Public Works and Highways (DPWH) kasumpay han mga kaso nga plunder ngan anomaliya ha flood control projects ha Bulacan.
An mando in ginpagawas dida han Pebrero 10, 2026 ha ilarom ni Presiding Judge Juan Ranola Jr., ngan ginmaduan an Bureau of Immigration nga ig upod an mga ngaran ha HDO list agud malikayan an paglakat ha nasud samtang nakabinbin an kaso.
Kaupod ha mga gin ngaranan ha order an anay DPWH Secretary Manuel Bonoan, anay Undersecretary Roberto Bernardo, ngan mga district engineers nga hira Henry Alcantara ngan Gerard Opulencia.
Nakalista gihapon an anay DPWH Undersecretary Cathy Cabral, nga tumalikod ha kadayuanan dida han Disyembre 2025, pero igin upod la gihapon ha dokumento kumo kaparti han mga orihinal nga respondent.
Subay ha Department of Justice (DOJ), an pitad in kaparti han pagsigurado nga maatubang ha proseso an mga nahingaranan ngan dire makakagawas ha nasud.
Samtang, nagsalawad na hin counter-affidavit hi anay DPWH Secretary Bonoan ngan nagpahayag hin intensyon nga bumiyahe ha Estados Unideos ha butnga han kaso.
Basar ha report han Commission on Audit (COA), mayda P275 milyon nga kantidad han flood control projects ha Bulacan nga mayda iregularidad, nga nagin basaranan han imbestigasyon.
Gintagan-duon gihapon han DOJ nga an PHDO in usa nga preventive measures agud mapabilin an integridad han proseso han hustisya.
Ha presente, nakatalaan nga igpadayon an pagdungog ha mga kaso nga iginpasaka kontra ha Estrada ngan mga anay opisyal han DPWH ha mga masunod nga bulan.
