NATIONAL–Ginduon han defense lawyer ni anay Pangulong Rodrigo Duterte nga hi Nicholas Kaufman nga waray partikular nga direktiba tikang ha anay Pangulo para patayon an mga drug suspects ha kasagsagan han kampanya kontra ha illegal nga droga.
Ginbuhat naman ni Kaufman an pahayag ha pagpapadayon han confirmation of cases hearing kontra kan FPRRD yana nga Huwebes, ika 26 han Pebrero, nga naka atubang ha kaso nga crimes against humanity kanit ha mga pagpatay ha anti-drugs campaign han alcalde pa hiya han Davao City ngan Pangulo han Pilipinas.
Sumala kan Kaufman, waray smoking gun o madig-on nga ebidensya ha kaso ngan waray ginaalegar nga bisan usa nga testigo nga mayada koneksyon ha ano man ha 49 nga insidente nga ginaakusa ha anay presidente an matestigo nga nakakarawat hin direkta nga mando tikang han anay Pangulo nga gumawas ngan pumatay.
Ginbatikos gihapon ni Kaufman an alegasyon han prosekusyon nga naglunsar hin pag-atake hi Duterte ha bug-os nga populasyon han Pilipinas salig ha polisiya agud nga ma-nutralisa an mga indibidwal nga gintutuod nga nahiupod ha krimen.
Gin rason gihapon ni Kaufman nga an mga namatay ha anti-drug operations in minimal kumpara han ihap han mga nadakop ngan operasyon nga ginbuhat han state forces.
Ginbalik ni Kaufman an ginmalatumat nga datos han ICC Prosecution tikang ha Philippine Drug Enforcement Agency (PDEA) nga ada ha 5,281 drug personalities an ginpatay ha anti-drug operations ha syahan nga 2.5 katuig han pagkapangulo ni Duterte.
Pero, ginpakita ni Kaufman an usa nga chart nga nagpapakita nga tikan ghan Hulyo 2016 kutob Pebrero 29, ada ha 97% drug personalities an gindakop ha anti-drug operations, samtang 3% an mga ginbawian hin kinabuhi.
