NATIONAL– Posible nga maatubang ha kaso nga syndicated o large-scale estafa an mga influencers nga dire la gihapon naundang ha pag-eendorso han illegal online gambling.
Ine an iginpahimatngon han Cybercrime Investigation and Coordinating Center (CICC) kahuman han ginhatag nga ultimatum han ahensya ha mga influencers nga ig undang an pag endorso ha mga ilegal nga online gambling dida pa han nakalabay nga semana.
Sumala kan CICC Deputy Executive Director Renato Paraiso, haros ngatanan na han influencers in sumugot ha ira apela pero mayda la gihapon mga matig-a an ulo.
Dida han Hulyo 15, gintikangan na han ahensya an pagpapadara hin notice ha mga influencers nga dire la gihapon nagsusunod, pira ha mga ine in grupo, agud papag-eksplikaron kun kay anu dire angay magpasaka hin kaso an gobyerno ha ira.
Sumala pa ha opisyal, posible nga umabot ngada ha katunga hin milyon kada semana an kuhida han mga dagko nga influencers ha ira pag-eendorso ha illegal online gambling.
Samtang, nakatalaan naman nga ig tap han ahensya an social media platforms agud ig take down an mga channel han content creators nga padayon nga nag-eendorso han illegal online gambling sites.
