TACLOBAN CITY – Ginkakalipay nga igpahibaro han Department of Health Eastern Visayas, nga nagtitika-hamubo na an kaso hiton dengue ha Sinirangan Bisayas.
Sumala kan Department of Health Eastern Visayas, Information Officer, Jelyn Lopez Malibago, nga subay ha datos nga kapot han
Regional Epidemiology Surveillance Unit in nakatala ine hin 14,934 nga kabug-usan nga kaso hin dengue tikang Enero 1 ngadto Nobyembre 16, 2024 kun diin 26 hini an namatay.
An mga kaso in umubos hin 53% dida han Morbidity Week 46, kun diin nahipatik la hin 118 nga kaso kumpara han 252 nga mga kaso dida han Morbidity Week 45. Samtang, an probinsya han Leyte la gihapon an mayda pinakadamo nga kaso, umabot na ha 4,644, nga nagkokomponer hin 31% ha rehiyon han mga kaso. Kadam-an han mga apektado in mga lalaki, ngan adton mga nag-eedad hin 1-10 anyos.
Bisan kun nagtitikaguti na an kaso han dengue ha rehiyon, an DOH-EVCHD in nakikipagsumpayan la gihapon kaupod an iba pa nga mga kasugbong nga ahensya, sugad man han mga lokal nga pangobyernohan ha pagpatuman hin mga estratehiya para mas maibanan pa an kaso han dengue ngan waray namamatay tungod hini.
