INTERNATIONAL – Nakakarawat yana hin mga pagsukna an ginbuhat ni US President Joe Biden nga paghatag hin pardon ha iya anak nga hi Hunter Biden.
Ine in mahuman masentensiyahan ha duha nga magkabulag nga kaso ha federal court yana nga tuig.
Gin-kondenar naman ni Biden an pagtratar ha iya anak, ilabi na ha mga kaso nga felony.
Hi Hunter Biden in nag-aatubang ha mga kaso nga may kalabutan ha sayup nga pahayag ha usa nga federal firearm form hadton 2018 ngan pagtatag-iya hin armas.
Samtang usa naman nga kaso an igin-salawad ha iya kabahin ha gin-aalegar nga paggamit hin illegal substance.
Sumala ha mga kritiko, kakulangan hin delicadeza an ginbuhat han presidente nga ig-pardon an iya kalugaringon anak.
Pero may iba naman nga tikang ha legal profession nga gintawag nga “wise move” an ginbuhat ni biden ilabi na nga malusad na ine ha pagigin presidente han Amerika.
