TACLOBAN CITY- Naghatag hin opinyon an Vice Chairman PDP Laban, Former Senate Secretary, Atty. Lutgardo Barbo, ha natatabo nga kasamok ha butnga han Presidente ngan Bise Presidente hiton aton nasud.
Una hine, nagin mapaso mangud an isyu ha butnga han duha nga higtaas nga lider hiton nasud, mahuman nga magpagawas an ika-duha nga pangulo hin pamahayag nga kun pananglitan mamatay hiya in mayda ine naka-tudlok nga hitman para patayon hi President Bongbong Marcos Jr. , ngan an asawa hine nga hi First Lady Liza Aranate Marcos, sugadman hi Senate Speaker Martin Romualdez.
Ha panindugan ni Vice Chairman PDP Laban, Former Senate Secretary, Atty. Lutgardo Barbo, an natatabo nga isyu in matungod ha simple la nga pamakiana kan Vice President Sara Duterte, kun ginkain hine an confidential fund han iya opisina, o anu an gingastusan hine.
Dugang pa hine, imbes nga batunon hin diretso in nagpakita la lugod ine hin kaisugon, ngan ginkakadto ha mga pamatay nga himangrawon an istorya kasumpay han confidential fund hiton President Bongbong Marcos Jr..
Ginatagan duon ni Barbo, kumo nagseserbisyo ha publiko kinahanglan makuha an gintatawag nga public trust, ngan naka-linya ha mandato nga trabaho nga magin transparensiya ine ha tanan nga natatabo ha iya opisina ha atubangan hiton publiko.
Ha lain nga bahin, ginpaangbit pa hiton anay senate secretary nga posible nga mapasakahan hin kaso an bise-presidente, pananglitan nga waray ine madig-on nga likwidasyon ngan mga kaangayan nga dokumento han confidential fund nga gingastos ha sulod la hiton 11-diyas.
