TACLOBAN CITY– Na ngangandaman na an buhatan hiton Department of Education Eastern Visayas, para hiton ti-arabot nga Eastern Visayas Regional Athletic Association (EVRAA) 2025.
Sumala kan Department of Education Eastern VisayasInformation Officer
Jasmin Francisco Calzita, napaghimangrawan na nira kun anu an bubuhaton, kun diin magkakamayda hira hin bubble set up para hiton nasabi nga paisan-isan.
Gintawag han ira buhatan nga bubble set-up matungod nga waray mangud lugar nga pwede pagdumaraon an tanan nga mga sports event, sanglit nga ginbatag-batag ine nira ha tulo nga lugar kalakip an Eastern Samar, Maasin, ngan Tacloban.
Ha Eastern Samar, pagdudumaraon an mga paisan-isan ha Pebrero 20-23, 2025, ngan an mga sports event nga pagdudumaraon amu iton: baseball, billiard, futsal, softball, boxing, sepak takraw, table tennis ngan arnis.
Ngan ha Maasin, pagdudumaraon an mga paugnat hiton kusog ha Pebrero 27- Marso 2, 2025, ngan an mga sports event nga pagdudumaraon amu iton: arnis, basketball (boys and girls category), badminton, chess, football, volleyball, taekwondo, wrestling, ngan archery.
Samtang an Tacloban, pagdudumaraon an mga paugnat hiton kusog ha Marso 6-9, 2025, ngan an mga sports event nga pagdudumaraon amu iton: gymnastics, aerobic gymnastics, swimming, athletics, dance sports, special games, ngan tennis.
Ha pagkayana, padayon an ira koordinasyon ha mga LGU’s nga bulig ha nasabi nga paugnat hiton kusog, matungod nga hira an magsisirbi nga mga venue han EVRAA 2025.
