TACLOBAN CITY– Ginpahibaro hiton buhatan han Tacloban City Social Welfare Development Office (CSWDO), nga padayon an ira programa para mga kababayin-an nga nagkikinahanglan hin bulig tikang ha ira buhatan.
Sumala kan Focal Person on Women Welfare Program Tacloban CSWDO, Carmela Bastes, tikang han bulan han Enero-Nobyembre, ada ha 233 cases an ira nahi-record, ngan an nasabi nga ihap in mas hitaas kumpara han nakalabay nga tuig, matungod nga han nakalabay nga tuig ada mangudla ha 179 cases an ira nahipatik han ira buhatan.
Usa ha mga nakikita nga rason han buhatan kun kay-anu humitaas an ihap hiton kaso han mga na-aabuso yana nga tuig in matungod maaram na an mga ine ha ira katungod, ngan sugadman mayda programa nga andam para bumulig ha ira.
Mababaruan, han mga nakalabay nga mga tuig dire paman-gud sugad nga maaram an ngatanan partikular na adton mga kababayin-an nga mayda programa an gobyerno nga andam bumulig ha ira ngan ine in gintatawag nga Violence Against Women and Children (VAWC).
