NATIONAL – Plano han legal counsel ni anay Presidente Rodrigo Duterte nga gamiton an resulta han Senate committee hearing nga anay ginpangunahan ni Sen. Imee Marcos.
Ine in agud igduon an nagin pag-aresto ha anay presidente kuton ha pagpapadara ha iya ha Netherlands nga daw dire makatarungan.
Sumala kan Nicholas Kauffman, an finding han nasabi nga komite in nagpapakita nga an pag-aresto ha anay presidente in mahitungod ha political motive.
Iginpapakita daw hira nga an nagin operasyon in usa nga ‘whole-of-government’ effort para palaprakon an mga Duterte.
Utro nga iginduon han abogado nga an pag-aresto ngan pagdara ha anay presidente ha The Hague in usa nga klase hin kidnapping, butang nga gumawas daw gihapon ha Senate investigation nga ginpangunahan han presidential sister.
Syahan na nga igin rason ni International Criminal Court (ICC) Deputy Prosecutor Mame Mandiaye Niang nga kun iginduduo han kampo han anay presidente nga hiya in na-kidnap diad han gindara ine ha ICC, mas importante daw nga magpabilin ine ha kustodiya han nasabi nga tribunal.
Rason pa han prosecutor, dire pipilionm han usa nga biktima han kidnapping nga utro bumalik ha kustodiya han mga nangidnap ha iya kun matagan man ine hin higayon nga maka-iskapo.
Sugadman, gintagan-duon ni Kaufman nga an iya claim kasumpay ha kidnapping in naka-base la ha committee report nga ginpagawas ni Sen. Marcos, kasunod han pira nga serye han imbestigasyon.
