TACLOBAN CITY – Titikangan na yana nga Myerkules, Setyembre 18, an pagpatuman han kadugangan nga flight han Philippine Airlines para ha Borongan City.
Sumala kan Borongan City Mayor Jose Ivan Dayan Agda, magigin tulo na kabeses na iton flights para ha nasabi nga ruta kada Lunes, Myerkules, ngan Biyernes.
An pagdugang han nasabi nga flights han PAL tikadto han nasabi nga syudad in mahitungod na gihapon han makusog nga suporta han mga Local Government Units, ngan sugadman mga residente han Borongan ngan Eastern Samar.
Dako daw gihapon an maibubulig han mga kadugangan nga flights ha mga negosyante han syudad ngan probinsya nga magdadara ngan magbabaligya han ira mga produkto sugad nala han mga marine products.
Makakabulig gihapon ine nga mai-promote an turismo han Borongan City agud makilala an ira lugar ngan sugadman ira mga sikat nga destinasyon sugad han surfing ngan diving destinations.
