Titikangan han House Committee on Justice ha Marso 2-4 an pagdungog ha upat nga impeachment complaint kontra kan Vice President Sara Duterte.
Ini an gin kumpirma ni House Committee on Justice ngan Batangas Rep. Gerville “Jinky Bitrics” Luistro.
Gin malatumat ni Luistro nga syahan nga tutudlukon han komite kun supresyente ha porma ngan sulod an mga reklamo.
Kun mahuman an deliberasyon ha porma ha syahan nga adlaw, dayun ini nga igkakadto ha panginano han mga sulod ha masunod nga adlaw.
Kun diri naman ini mahuman, magpapadayon ha masunod nga adlaw an pagdungog.
Pwede gihapon igpadayon an mga pagdungog bisan kun naka-recess an Kamara, kun kinahanglan.
Sumala kan Luistro, importante nga proseso an impeachment sanglit dire ini angay madelatar.
Dire naman makakagtikang dayun yana nga semana an komite mahitungod nga kinahanglan pa kopyahon ngan igpanhatag an mga reklamo ha ngatanan nga membro.
Igin eksplikar gihapon ni Luistro nga dudrungan nga paghihisgutan an upat nga reklamo ha uusa nga impeachment proceeding, pero dire la anay ini pisikal nga pag-uurusahon; magkakamay-ada la hin konsolidasyon kun matudlok na an probable cause.
Paghihingadayan an kada reklamo ngan kada ground hin bulag, pero an pagbotos han mga membro in igbabasar ha kabug-usan han kada impeachment complaint.
Dugang pa ni Luistro, kun mapasar ha panginano an porma ngan sulod han mga reklamo, tatagan an respondent hin 10 kaadlaw ig salawad an baton.
May tulo kaadlaw an complainant para mag-reply ngan tulo kaadlaw gihapon ha respondent para ha rejoinder.
