ENTERTAINMENT – Mahuman nga masipatan nga magka-holding hands ha usa nga fun run, igindiwara han aktor nga hi Jameson Blake an himangrawon nga mayda nira relasyon han aktres nga hi Barbie Forteza.
Ha usa nga episode han vlog ni Ogie Diaz han nakalabay nga Hulyo 4, iginpasaro hini an mensahe ni Blake, kun diin ginklaro han aktor nga waray hira relasyon ni Barbie.
Pag-isplikar niya, damo an napakuha hin hulagway ha ira nga duha ngan ginkaptan la niya an kamot ni Barbie para alalayan an aktres tigawas han event mahitungod nga damo an tawo.
Manunumduman nga nag-ugat an alegasyon mahuman nga makit-an an duha nga magkaupod ha nasabi nga fun run ha Pampanga han nakalabay nga Hunyo ngan dida gihapon ha “Takbo para sa Pelikulang Pilipino” han bulan han Mayo.
Samtang, hi Jameson ngan Barbie in magkakaupod ha usa nga ti-arabot nga pelikula nga may titulo nga “Kontrabida Academy” kaupod hi Eugene Domingo, pero waray pa ini kadugangan nga detalye, sugad han istorya ngan an petsa kun san-o igpapagawas.
