Naghatag hin magarbo ngan puno hin kalipayan ha mga A’tin an P-pop Kings SB19 ha ira sold-out concert nga “Wakas at Simula: The Trilogy Concert Finale” nga gin buhat ha SMDC Festival Grounds ha Parañaque dida han Sabado, Abril 18.
Ginbabana-bana umabot ha 100,000 nga mga fans an umatender ha nasabi nga concert tikang ha magkaduro-dililain nga parte han kalibutan nga gintudlok han 1Z Entertainment team kumo pinakadamo nga attendees ha usa la ka adlaw nga concert ha kasaysayan han grupo.
Ha direksyon ni Paolo Valenciano ngan produksyon han 1Z Entertainment kasugbong an Live Nation PH, usa ha mga gin andam ha mao nga concert an upat nga dagko nga mga entablado ha concert grounds, makabag-o nga production design, fireworks displays nga nagtikang ug naghuman han programa sugad man han fan projects ngan drone show nga igin andam han mga fans para ha Mahalima.
Malipayon nga gin tikangan han P-Pop Kings an mao nga concert pinaagi han ira mga hit songs nga “DAM,” “WHAT?,” ngan “GENTO”.
Samtang, waray naman kapugngi han mga miyembro an ira emosyon samtang gin dudumdom an ira gin tikangan. Tikang ha gutiay nga fans nga na suporta, haligot nga mga venues han ira mga concert, world tours, ngada ha pinakadako nga performance nga ira gin buhat.
Gin kanta gihapon han mao nga grupo an ira mga makaturuok nga kanta sugad han “MAPA,” “ILAW,” “LIHAM,” “QUIT,” ngan “WAKAS”.
Presente ha mao nga concert an Japanese boy group nga BE:FIRST para ha ira collaboration song han SB19 nga “Toyfriend.”
Sumala ha SB19, panuyuan han mga ini nga mapahitaas an lebel han OPM diri la para ha ira kalugaringon, kundi agud makag abre hin mas damo nga oportunidad para ha mga Pilipino.
Kadungan hini, gin anunsyo gihapon han 1Z Entertainment an ira kauna-unahan nga girl group nga “XONARA”.
Nakatalaan naman nga mag perform an Kings of P-pop ha Lollapalooza ha Estados Unidos ngan ha Summer Sonic ha Japan ha mga masunod nga bulan.
