| Pumalag an vlogger nga hi Jack Argota kasumpay ha posible nga pag-subpoena ha iya han National Bureau of Investigation (NBI) kanit ine ha gin-aaligar nga pagpapasarang han peke nga medical record ni Pangulong Ferdinand Marcos, Jr.
Ha iya nagin post ha social media, naghatag hin mga tirade nga reaksyon hi Argota, kun diin syahan hine nga ginbatikos hi Atty. Jesus Falcis ngan gindepensaran an iya kalugaringon.
Mababaruan nga ginpahayag han kilala nga abogado nga hi Atty. Falcis nga duha an klarado nga sala ni Argota, syahan an pag-post han gin-aaligar nga medical record han Pangulo, nga posible nga tumalapas ha medical ngan data privacy laws ngan an pagpapasarang nga may “kanser” hi Marcos Jr., nga maikokonsidera nga fake news ngan dire ine sulod ha medical record.
Pagdig-on han vlogger nga nakit-an niya an dokumento ha social media ngan na-enhance niya ine gamit an ChatGPT.
Manunumduman, ginpahayag ni NBI Acting Director Lito Magno, nga gin-iimbestigaran na hiton ahensya an mga indibidwal nga dabi han pagpasarang han mga dokumento.
Ha post naman ni Atty. Falcis, ginkikita pa hiton NBI an tanan nga angulos sugad hiton cyberlibel, false news (Revised Penal Code), data privacy, ngan bisan nga gindelete na ni Argota an post, in posible la giahpon in nga ma-retrieve kumo ebidensya.
Gin-ayat gihapon hine an hanuman nga igpakita an orihinal nga medical record han Pangulo agud nga himuon nga basaranan kun peke ine.
Ha pagkayana, waray pa opisyal nga pahayaga an Malacañang kasumpay ha kontrobersiya.
