BEIRUT, LEBANON – Naglunsar an Israel hin mga panibag-o nga pag-atake ha Lebanon ngan Iran ha ikapito ka-adlaw o usa ka-semana nga gyera ha Middle East.
Ginkumpirma han Israeli Defense Forces dida han Biyernes nga naglunsar hira hin serye hin airstrikes ha Beirut, Lebanon kun diin target han mga ini an sites han Hezbollah.
Kaupod dinhi an command centers ngan multi-story buildings ha Beirut, sugad gihapon ha pasilidad kun diin nakatirok an drones han militante nga grupo, nga gingagamit para ha ira terror attacks tikang ha mga tropa ngan estado han Israel.
Sumala ha IDF, aada ha 26 nga serye na han airstrikes an ira gilunsar ha Dahiyeh area han Lebanon, suburb ha sur nga parte han Beirut nga kadam-an ha nangungukoy ha lugar in mga Shia Muslim.
Ginkokonsidera mangud han Israel nga an suburb in kuta han Hezbollah. Nagresulta naman an panibag-o nga panhadlok ngan panic han gin-anunsyo han Israel military an pag-evacuate han haros tanan nga mga molupyo nga aada ha Beirut.
