TANAUAN, LEYTE – Gin malatumat ni Tanauan, Leyte Former Mayor ngan Solana Logistics Services Head, Pel Tecson, nga mas maupay nga unahon han nasyunal nga gobyerno an paghahatag hin mga interbensyon ngadto ha mga apektado nga sektor kasumpay han tigdaay nga paghitaas han presyo han mga petroleum products.
Mahitungod gudman han kasamok nga padayon nga nahitatabo ha Middle East in naapektuhan an suplay han lana ha bug-os nga kalibutan nga nagdurot hin dako nga pagkiwa ha presyo hini.
Ugsa pa man magtikang an kasamok in nakada na ha sobra-kulang P50 an presyo han kada litro han lana, pero han pagtikang han kasamok in sumipa ini dayun ha P80.
Dugang pa ni Tecson, dako an epekto hini nga sitwasyon ha ngatanan nga sektor, dire la ha ira nga mga truckers kundi labi na ha sektor han transportasyon, mahitungod nga an ‘backbone’ han ekonomiya han nasud in an transportasyon.
Gin suhestyon naman hini nga mas makakaupay an kadagmitan nga paghahatag hin subsidiya ngadto han mga sektor nga apektado agud maremedyuhan dayun an paghitaas pa han presyo han gasolina.
Ginmalatumat pa hini nga kun dire ngani maagapan an sitwasyon in maaapektaran gihapon an pamresyuhan han mga basic necessities ngan prime commodities.
Samtang, malabo pa naman nga mahuman dayun an kasamok han US-Israel ngan Iran mahitungod nga subay Estados Unidos, dire hira makikig-‘deal’ ha Iran samtang dire ine nagbubuhat hin “unconditional surrender.”
