Posible umabot an inflation han nasud ha butnga han 5.0% kutob 6.0% yana nga 2026 mahitungod ha hitaas nga presyo han lana, kakulangan ha suplay han pagkaon, ngan mga “second-round effects” nga nagpapaduro ha paghitaas han presyo, subay ha usa nga anay opisyal han Bangko Sentral ng Pilipinas (BSP).
Subay ha GlobalSource Partners economist ngan former BSP Deputy Governor Diwa Guinigundo, nasulod an Pilipinas ha mas delikado nga parte han inflation, kun diin tikang ha temporaryo nga supply shocks tikadto ha padayon nga cycle han inflation.
Umabot gudman di pala maiha ha 4.1% an inflation dida han Marso, mas hitaas kumpara ha 2.4% dida han Pebrero ngan sobra soble naman dida han nakalabay nga tuig nga nagpapasabot han nagtitikaduro nga pressure ha presyo.
Gin amin han BSP an kadelikaduhan ngan ginpahitaas an ira projection para ha inflation yana nga tuig tikang ha 3.6% ngan 3.2% tikadto ha 5.1% ngan 3.8%.
Sumala pa kan Guinigundo, an hitaas nga presyo han lana ha world market, limitado nga suplay han pagkaon ha lokal, ngan second-round effects sugad han hangyo nga paghitaas han sweldo ngan adjustments ha pamasahe ngan utilities nga amu an nagduduso ha padayon nga inflattion.
Maapektaran gihapon an pag-ursa han ekonomiya mahitungod nga maiibanan an purchasing power han kabablayan.
Ha panginano naman han GlobalSource Partners, posible huminay hin 0.5–1.5 points an gross domestic product growth tikang ha baseline nga 5% kun magpapadayon an krisis.
Gintagan-duon pa ni Guinigundo nga sakto an posible nga paghitaas han policy rate hin 25 ngada ha 50 basis points, kaupod an klaro nga forward guidance, basta nagpapabilin an kredibilidad han polisiya.
