TACLOBAN CITY – Mas duru-damo an ihap han mga lalaki nga nagpapakamatay, ine in basar ha datos tikang han nakalabay nga tuig han Department of Health Region 8.
Sumala kan Winnie Dorego, Mental Health Program Manager hiton Department Of Health Regional Office Vlll, kaurugan han mga nagpapakamatay in natikang ha teenager ngada ha adult stage.
Dugang pa hine, usa ha mga rason nga nag-aawat han ira kalugaringon nga kinabuhi an usa nga tawo in mahitungod han sobra-sobra nga gindadara nga problema labi na kun waray an mga ine nasusumatan nga iba.
Damo naman daw an mga pamaagi agud maresolba an mga problema ngan damo gihapon nga mga ahensya an pwede daupan kun nagkikinanglan hin bulig.
Dire daw gihapon kinahanglan nga igkaawod o igkahadlok an pagdaop ha mga mental institutions o mental doctors mahitungod nga an mental health in usa gihapon nga health.
