Temporaryo nga ginsuspinde han Eastern Visayas State University an pagsusul-ot han shcool uniform ha tanan nga klase ngan mga aktibidad ha unibersidad may paghisumpay ini han nagtitikahitaas nga heat index ha Sinirangan Bisayas.
Sumala kan EVSU Information Officer Jenette Ruedas, an direktiba in ginpagawas han Office of the University President agud maproteheran an panlawas ngan seguridad han mga estudyante ngan sugad man han mga university staff kontra ha naabatan nga kapaso hiton panahon nga senyales han tiaarabot nga El Nino.
Ha ilarum han kamaduan, gintutugotan an mga estudyante nga magsul-ot hin komportable nga panapton pero naabuyon ha regulasyon han eskuylahan samtang nagpapabilin nga suspendido an uniform requirement.
Sugadman, ginmamandohan la gihapon nga magsul-ot an mga estudyante han ira opisyal nga student ID ha sakob han campus.
Dugang pa ni Ruedas, nga an nasabi nga pitad in precautionary measures han unibersidad ha butnga hiton naabatan nga grabi nga kapaso ha rehiyon nga posible magdurot hin heat-related illnesses ha mga estudyante ngan empleyado.
Samtang, magpapabilin naman nga epektibo an suspensyon kutob Oktubre 2 kun diin, posible gihapon ini ma-extend kun mas grumabi pa an naabatan nga kapaso hiton panahon.
