Nanawagan hi Senator Risa Hontiveros hin dayun nga pagsisigurado ha katalwasan han mga Pilipino ha Middle East, klaro nga mekanismo para ha repatriation, ngan konkreto nga pitad agud proteheran an energy security han nasud ha atubangan han nagtitikaduro nga kasamok ha Middle East.
Sumala kan Hontiveros, kinahanglan magpabilin nga naka-alerto ngan andam umalalay an Department of Migrant Workers (DMW) ngan an Department of Foreign Affairs (DFA) ha kada Pilipino nga nanginginahanglan hin proteksyon.
Labot ha talwas nga pag-uli han mga overseas Filipino Workers (OFWs), iginduon han senador nga kinahanglan gihapon an klaro nga contingency plans para ha ira pakabuhi ngan para ha posible nga epekto han krisis ha energy, oil, ngan gas supply ha Pilipinas.
Kasunod hini, nanawagan an senador ha Department of Energy (DOE) nga dayun magpatuman hin short-term safeguards samtang ginbubug-os an usa nga komprehensibo ngan panmaihaan nga strategic plan agud mapabilin an kadig-on han suplay han enerhiya ngan maproteheran an mga industriya kontra ha paghitaas han presyo ngan kakulangan ha suplay.
Ha kaluyo han nagtitikaduro nga tensyon, naglalaum naman hi Hontiveros nga magios an United Nations agud mapugngan an pagduro pa han tensyon ngan maibalik an pagrespeto ha international law.
Ha kaurhian, nagpahibaro an senador han iya pagkabaraka ha waray kaluoy ngan pagsulod han administrasyon nira US President Donald Trump ngan Israeli Prime Minister Benjamin Netanyahu ha kasamok, sugadman an pag-atake han Iran ha pira nga Gulf States, nga klaro nga nagruruba ha pagkalibutan nga kahimyangan.
Duon pa hini, an makabuluhan nga direksyon la ha presente in de-escalation, diplomasiya, ngan dayun nga pagbabalik ha mahimyang nga pag-iistorya.
