NATIONAL–Nanawagan hi Senador Risa Hontiveros hin dagmit nga pagsigurado ha katalwasan han mga Pilipino ha Middle East, klaro nga mekanismo para ha repatriation, ngan konkreto ga pitad agud nga proteharan an energy security han nasud ha atubangan han nagtitikagrabe ga komosyon ha Middle East.
Sumala kan Hontiveros, dapat in magpabilin ga naka-alerto ngan andam sumuporta an Department of Migrant Workers (DMW) ngan an Department of Foreign Affairs (DFA) ha kada Pilipino nga nanginginahanglan hin proteksyon.
Labot la ha talwas nga pag-uli han mga overseas Filipino workers (OFWs), ginduon han senador nga kinahanglan ihapon an klaro nga contingency plan para ha ira pakabuhi gan posible nga epekto han krisis ha energy, oil, ngan suplay han gas han Pilipinas.
Kasunod hine, nanawagan an senador ha Department of Energy (DOE) nga dayon nga magpatuman hin short-term safeguards samtang ginbubug-os an usa nga komprehensibo ngan pan-maiha ga strategic plan agud nga igpabilin an stabilidad han suplay han enerhiya gan maproteharan an industriya kontra ha paghitaas han presyo ngan kakulangan ha suplay.
ha kaluyo han nagtitikagrabe ga tension, ginlalauman naman ni Hontiveros nga ma-gios an United Nations agud nga pugnan an labi pa nga pagduroy hiton tension ngan igpabalik an pag-respeto ha international law.
Ha katapusan, ginpasabot han senador han iya pagbaraka ha ginaalegar nga ‘walang habas’ nga pagsulod han administrasyon nira US President Donald Trump ngan Israeli Prime Minister Benjamin Netanyahu ha gyera, suugad gihapon an pag-atake han Iran ha pira ka Gulf States, nga ginmalatumat han senador nga klaro nga nanruruba ha pankalibutan nga kamurayawan.
Ginduon pa niya nga an mahinungdanon ga direksyon ha presente in de-escalation, diplomasya, ngan dagmit nga pagbalik ha mamurayawon nga dayalogo.
