TACLOBAN CITY–Arestado na an suspek hiton panbuno nga natabo ha mercado publiko hiton syudad ka kulop nga adlaw, samtang dead on arrival naman an biktima hine.
Ginkilala an suspek kan alyas Sem 39-anyos parag baligya hiton karne ngan residente hiton Barangay 23-A Tacloban City.
Samtang ginkilala naman an biktima kan alyas Dune 48-anyos may-asawa ngan kabulig han parag-baligya hiton karne sugadman residente hiton Brgy. 105 Suhi Tacloban.
Sumala Recardo Ogardo, OIC Market Superintendent, subay ha iya nagin mga pamakiana ha mga nakasaksi, nalingkod an biktima ha iya ginbabaligyaan nga pwesto, ngan waray an mga ine nabatian nga nagka-debate an suspek ngan biktima ugsa matabo an insidente.
Dugang pa ni Ogardo, tigda nala nakabati an mga witness hiton pangaradol kun diin naghihika-iskapo ine ha mao nga insidente.
Ine naman nga takna nabaraka na an mga witness ngan didto na hira nangaro hin bulig han kumita na hira ha biktima nga natumba na an ine ngan mayda binun-an, ngan nagkakarigo na hiton iya dugo.
Gin-aaligar naman nga anay na gin-kastigo hiton suspek an biktima, ngan kilala ine nga suspek nga mapaso permanente iton panmuroot-buot, ngan kilala nga madarahog ha iya igkasi- paragbaligya.
