Natudlok na han gobyerno kun ano nga grupo an nagtikang han bayolente nga insidente dida han nakalabay nga adlaw han Ayala Bridge ngan Mendiola nga nahingadto ha pagkakasamad han damo nga kapulisan ngan pira nga sibilyan.
Gintudlok ni DICT Secretary Henry Aguda an grupo nga anonymous.ph nga nagtikang han pan-aaghat han pagsamok online.
Ine daw in usa nga aktibo nga grupo nga nan-aghat nga magsul-ot hin itom nga maskara ngan bado ngan umupod ha pagkadto ha parte han Malakanyang.
Nakipagsumpayan na gihapon hira ha nasabi nga grupo pero hasta yana in dire pa ine gindidiwara kun hira ba o dire an nagbuhat han pagsamok.
Sumala pa kan Aguda, mayda na hira persons of interest nga ginbabantayan.
Ginmalatumat naman ni DILG Secretary Jonvic Remulla nga mayda intelligence report hira nga nakarawat nga an target gudman han mga grupo in sunugon an Malakanyang.
