NATIONAL – Maduon nga ginkondena ni Deputy Speaker David “Jay-Jay” Suarez an “weaponization” han sayop nga impormasyon nga ginhihimo ngan ginpapasarang han mga peke nga pro-Duterte social media accounts, nga daw nagpapahinay ha demokrasya han Pilipinas ha nagtitikarani nga 2025 midterm elections.
Natuod hi Suarez nga ine in digital warfare ngan an battlefield in dire la an internet kundi an huna-huna ngan kasing-kasing han milyon-milyon nga mga Pilipino.
Reaksyon ine ni Suarez ha usa nga report han Reuters nga nagbubuyagyag han paggamit han mga peke nga account ha social media para dayawon hi anay Presidente Rodrigo Duterte ngan impluwensyahan an istorya kasumpay han tiarabot nga piniliay.
Subay ha research han Israeli tech firm nga Cyabra, ginbabana-bana nga usa ha kada tulo nga account nga nagpo-post hiunong ha pag-aresto kan Duterte han International Criminal Court (ICC) in peke.
Subay pa ha report, haros 45% han mag diskuros kabahin ha 2025 election in ginpapasarang han mga peke nga account sugad han bots, fake profiles, ngan mga bayaran nga influencers—ngan naabot ine ha milyon-milyon nga netizens.
Sumala kan Suarez, nagtitikakusog ngan nagtitikarait an mga network han disinformation sanglit hinay-hinay nga natatahuban an boses han mga tinuod nga tawo ha internet, samtang hinay-hinay nga naguguba an pagtapod han publiko ha mga institusyon nga dapat in nagseserbi ha ira.
