WASHINGTON D.C., – Tumestigo na hi anay US Secretary of State Hillary Clinton ha nagpapadayon nga imbestigasyon kasumpay ha mga krimen nga nabuhat han kontrobersiyal nga American financier ngan sex offender nga hi Jeffrey Epstein.
Siyahan nga lumutaw an ngaran han iya asawa nga hi anay US President Bill Clinton ha Epstein files nga ginpagawas han Department of Justice, bisan man waray akusaran an mag-asawa han bisan ano nga iligal nga buruhaton kasumpay ha kaso ni Epstein.
Ha iya pagtestigo, ginklaro ni Hillary nga waray hiya kalabutan ngan waray hiya impormasyon kasumpay ha mga krimen nga nahimo ni Epstein.
Karuyag la hini gumawas an kamatuoran ngan ginaghat an mga mambabalaud nga imbestigaran lugod hi US President Donald Trump kasumpay ha iya nakalabay nga koneksiyon ha namatay nga sex offender.
Ha iya pagatubang ha media, ginpahayag ni Hillary an iya pagkadismaya mahitungod waray ginpubliko an iya testimonya.
Ginsukna gihapon ni Clinton an Republican members han komite ha dire pamakiana ha iba nga indibidwal kaupod an convicted associate ni Epstein nga hi Ghislaine Maxwell.
