NATIONAL – Gin abswelto han Sandiganbayan hi anay Philippine National Police (PNP) Chief Jesus A. Verzosa ngan 10 nga iba pa nga pulis ha kaso nga graft may paghisumpay ha daw iregular nga pagpalit han duha nga second-hand helicopter dida han 2009.
Labot ka Versoza, ginpa-waray sala gihapon han anti-graft court hira P/DDG Jefferson P. Soriano, P/Supt. Ermilando O. Villafuerte, P/SSupt. Luis L. Saligumba, P/SSupt. Job Nolan D. Antonio, P/SSupt. Edgar B. Paatan, P/CInsp. Maria Josefina V. Recometa, P/Supt. Claudio De Gaspar, Jr., SPO3 Ma. Linda A. Padojinog, PO3 Avensuel Go Dy, ngan Ruben Sarabillo Gongona.
Ha kaluyo hine in guilty naman an nagin sirot han Sandiganbayan kontra kanda P/Dir. Luizo Cristobal Ticman, P/Dir. Ronald D. Roderos, P/Dir. Romeo C. Hilomen, P/Dir. Leocadio Salva Cruz Santiago, Jr., ngan private individual Hilario Bautista de Vera para ha kaso nga graft.
Ginsirotan an mga ine hin unom ngada ha walo katuig nga pagkaka-preso ngan perpetual disqualification ha pagkapot han mga pampubliko nga trabaho.
Hin Roderos in ginsirotan gihapon nga guilty ha falsification of public documents nga gintudlok ha ilarom han Article 171 han Revised Penal Code ngan ginsirotan hin penalty nga upat katuig ngan duha kabulan nga prison correccional nga dire maubos ha walo katuig nga usa kaadlaw han prison mayo kumo maximum.
Ginmanduhan gihapon ine nga magbayad hin penalty nga P5,000.
Kun manunumduman, dida han 2009 in pumalit hi Verzosa ngan an kaparehas hine akusado hin tulo nga helicopter tikang ha Manila Aerospace Products Trading Corp. — duha nga standard Robinson R44 Raven I light police helicopter nga nagkakantidad hin P62,672,086.90 ngan usa nga Robinson R44 Raven II LPOH nga nagkakantidad hin P42,312,913.10.
