NATIONAL- Ginbulgar ni anay Department of Public Works and Highways (DPWH) Bulacan district engineer Henry Alcantara an mga anomalya ha flood control projects nga ginkakalakipan han pira nga mga manbaralaod.
Ginhimo ni Alcantara an pamayahayag mahuman basakon an iya salaysay ha gindumara nga hearing ha Senate Blue Ribbon Committee yana nga adlaw.
Sumala kan Alcantara hira Senador Joel Villanueva, Senador Jinggoy Estrada, anay Senador Ramon “Bong” Revilla Jr., ngan Ako Bicol Rep. Zaldy Co an daw mga nakatagamtam han budget insertions ngan kickbacks.
Dugang pa ni Alcantara, hi anay DPWH Undersecretary Robert Bernardo an nagmando ha iya kasumpay han mga pondo nga naka-alutaga para ha nasabi nga mga opsiyal.
Subay hine, ginpahayag ni Bernardo nga an P300 million tikang ha 2024 General Appropriations Act (GAA) insertions in para kan Revilla.
Ha kaso naman ni Sen. Villanueva, ginpahayag ni Alcantara nga naghangyo ine hin P1.5 billion para ha usa nga multipurpose building hadton 2022, pero P600 million la an naaprubaran.
Matungod dinhe, ginsagdunan hi Alcantara ni Bernardo nga mag-alutaga hin P150 million ha usa nga proyekto para kan Villanueva, nga pagkadugay in nahingadto ha flood control projects ngan dire ine maaram hi Villanueva.
Samtang, kan Sen. Estrada, ginpahayag ni Alcantara nga nahingaranan ha ira ni Bernardo an nasasalin nga P355 million tikang ha 2024 budget nga para kan “SJE,” nga an gintutudlok in hi Estrada, ngan gin-amin hine nga waray hiya direkta ng akomunikasyon kan Estrada.
Ha katapusan, iginlakip gihapon ni Alcantara hi Rep. Zaldy Co, matapos mahuman hira magkita han Setyembre 2021 ha usa nga katitirok kun diin ginpag-istoryahan niya an pagbubutang hiton pondo ha distrito ni Alcantara para ha flood control projects.
