NATIONAL – Napahinumdom an usa nga eksperto ha mga simple nga pitad ha panlawas agud malikayan nga maduktan han super flu, usa nga variant han influenza A.
Sumala kan Dr. Evalyn Roxas, infectious disease specialist han UP Manila, an sakto nga kalimpyo, responsable nga gawi, ngan bakuna an pangunahon nga depensa kontra ha influenza.
Kaupod ha mga pitad an agsub nga paghuhugas han kamot, sakto nga paagi han pag-ubo ngan pag-haching, ngan pagsusul-ot hin facemask kun nakakaabat han mga sintomas.
Dugang pa hine, dire kinahanglan ig undang an tradisyunal nga pagmamano basta mayda sakto nga kalimpyo, ngan importante gihapon nga magpabilin ha panimalay kun mayda sakit agud dire makatapon ha iba.
Ginmalatumat gihapon han infectious disease expert nga an matawo nga lugar in mas hitaas an hulga, labi na ha mga mayda mahinay nga immune system, sanglit igin aabiso nga likayan an matawo nga lugar ha sugad nga panahon.
Dugang pa, an sakto nga flu vaccination in epektibo ngan ginre-rekomenda agud maproteheran an kalugaringon kontra ha influenza.
Samtang, gintagan-duon han DOH ngan eksperto ha publiko nga an simple nga kalimpyo ngan responsable nga pamatasan an pinakamabisa nga pamaagi agud malikayan an ‘super flu.’
Syahan na nga ginklaro han DOH nga dire bag-o nga sakit an super flu ngan an mga sintomas hine in waray ginkaibhan ha komon nga trangkaso sugad han ubo, sip-on, hiranat, ngan pagsakit han kalawan.
