TACLOBAN CITY – Duha nga mga rebelde nga taga-Calbiga, Samar an nagsurender ha Calbiga Municipal Police Station.
Ginkilala an mga ine kanda alyas Ker, 36-anyos an pangidaron, usa nga staff han SRC Emporium ngan membro han Municipal Group Unit ni Ka-Onang, ngan membro gihapon han Libas Platoon nga ginmamanguluhan naman ni Ka-Liloy ngan alyas Pacayra, 34-anyos an pangidaron, membro gihapon han nasabi nga mga grupo.
Sumala kan PCpt. Marvin Labrague, Chief of Police hiton Calbiga Municipal Police Station, taga-Calbiga an mga ine pero nakadto an mga ine pagdudumara han ira operasyon ha Silvino Lobos, Northern Samar.
Ha pagsurender han mga ine in dayun an mga ine nga kumarawat hin cash assistance ngan grocery items agud may magastos ngan magamit nga pagtikang samtang ginpo-proseso pa an pagbulig han mga ine ha mga programa han gobyerno para ha mga rebel surrenderees.
Samtang, nanawagan naman an nasabi nga opisyal ha mga aadto pa ha kabukiran nga bumalik na ha gobyerno ngan dire mag-alang pakipagsumpayan ha ira kay andam hira nga bumulig ha mga ine.
Ha pagkayana in ada na ha ilarom han kustodiya han Calbiga Municipal Police Station an mga ine.
