TACLOBAN CITY – Patay an duha katawo samtang samaran naman an duha mahuman an pamusil nga nahitabo ha may Brgy. Sto. Niño, Tunga Leyte.
Ginkilala an mga patay nga lawas kanda Benjamin Balais, ada ha legal nga pangidaron, ngan residente han Brgy. Pitogo Barugo. Leyte, ngan Ace Sonorio, ada ha legal nga pangidaron, ngan residente han Brgy. Abango, Barugo Leyte kun diin dead-on-the-spot an mga ine. Samtang samaran naman hira Jastine Cello, manager han food house, ngan residente han Brgy. Binibihan, Carigara, Leyte, ngan Mary Jean Lucelo, cashier han food house, ngan residente han Brgy. San Roque Tunga Leyte.
Sumala kan PMaj. Jenyzen Veloso, Chief of Police han Tunga Municipal Police Station, tigda la nga gin pamusil an mga biktima han mga suspek samtang nakadto an mga ine ha sulod han food house para kumaon.
Nagawas naman ha inisyal nga imbestigasyon han kapulisan nga upat nga waray pa kahikikila-i nga mga kalalakihan an suspek han pamusil kun diin sakay an mga ine hin usa nga Ford SUV Vehicle nga itom an color.
Dayun naman nga kumalagiw an mga suspek kahuman pagpamusil han mga ine.
Ha pagkayana in padayon naman ginbubuhat nga imbestigasyon han mga otoridad parte han panhitabo.
