TACLOBAN CITY – Ginpahayag han Tacloban City Health Office nga nagpapadayon an ira door-to-door strategy ha pagdumara han COVID-19 vaccination ha syudad.
Sumala kan Dra. Gloria Fabrigas, head han Tacloban City Health Office, an mao nga stratehiya in ira gin adapt tikang ha DOH kun diin mayda nira team nga naglilibot ha mga barangay agud nga matudlok kun hira hin-o an mga waray pa katuruki hin COVID-19 vaccines.
Mahuman ini, in nagtutudlok naman hira hin adlaw para han ira door-to-door nga pagkadto ha mao nga barangay agud nga magdumara hin panbakuna.
Dugang pa hini nga an mao nga pitad in agud nga mas mapahalawig pa an vaccine coverage ha syudad ngan makab-ot an herd immunity kontra COVID-19.
Samtang, ginpahayag naman ni Dra. Fabrigas, nga mahugot an ira ginbubuhat nga pitad ha pagkayana ha ginbabantayan nga panibag-o nga variant han Omicron pero ginklaro naman hini nga waray pa ini pakasulod ha syudad.
