TACLOBAN CITY – Mas ginpahuruhugot han Department of Labor and Employment (DOLE) an ira kampanya kontra endo pinaagi han pag-regularize hin mas darudamo nga mga mananarabaho ha bug-os nga Sinirangan Bisayas yana nga tuig.
Sumala kan DOLE 8 Regional Director Yahya Centi, ha 9,000 nga mga contractual employees nga target for regularization, maabot na ha 6,492 an naregular yana nga Setyembre, kun diin 72% ini han ira target.
Dugang pa hini nga kaurugan ha mga naregular nga mga mananarabaho adton mga employed ha micro, small and medium enterprises.
Nagdudumara gihapon hira hin on going assessment ha mga dagko nga mga establishmento nga nag-ooperate ha rehiyon agud nga maaghat an mga business owners nga himuon nga regular an ira contractual employees.
Nahibaruan nga maabot ha 62 porsyento na han 1,458 nga mga establishmento ha rehiyon an napailarom na ha inspeksyon han DOLE 8.
Target naman han DOLE 8 nga makompleto ini san-o mahuman yana nga tuig o ha bulan hit Disyembre mahitungod nga amo ini an nakabutang ha ira mandato.
