TACLOBAN CITY– Nakaghipatik an Department of Health Eastern Visayas (DOH-8), hin maabot 920 nga kaso hiton naduktan hiton dengue ha bug-os nga Sinirangan Bisayas.
Sumala kan Department of Health Eastern Visayas, Information Officer, Jelyn Lopez Malibago, kadam-an nga naduktan ha nasabi nga mga ihap in mga kabataan nga kalalakin-an, nga nag-eedad hin 1-10 years old.
Dugang pa ni Malibago, an nasabi nga record, in tikang han Enero 1- Pebrero 22, han presente nga tuig.
Ginmalatumat pa hine nga ada na ha 2 nga indibidwal iton namatay tungod hiton nasabi nga kaso.
Ha kaluyo hine, ginpaangbit ni Malibago nga mas hamubo ine nga ihap kumpara han nakalabay nga tuig ha kaparehos nga period nga mayda 1,295 an nahipatik han ira buhatan.
Nagpasalamat naman an nasabi nga opisyal, partikular na ha publiko tungod hiton ira kooperasyon ha ira mga tagsa-tagsa nga barangay agud nga mapugngan an pagdamo hiton dengue.
