Gin iimbestigahan na han Department of the Interior and Local Government (DILG) an pira nga alkalde ngan lokal nga opisyal ha Cebu nga bumiyahe tikadto ha Europa samtang ginlalasurbo han Bagyong Tino an probinsya han Cebu, nga nagdurot hin dako nga danyos ngan pumatay ha sobra 100 nga kinabuhi.
Sumala kan Assistant Provincial Administrator Aldwen Empaces, ginmanduhan han DILG Central Office an Kapitolyo han Cebu nga magpasa hin mga travel order ngan kaangayan nga dokumento agud matudlok kun may-ada legal nga basaranan an mga biyahe han nasabi nga mga opisyal.
Kaupod ha mga natagan ni Gov. Pamela Baricuatro hin Foreign Travel Authority (FTA) an pito nga alkalde tikang ha magkaduru-dilain nga bungto ha Cebu, pati na gihapon hi Provincial Board Member Andrei Duterte.
Gin klaro naman ni Governor Baricuatro nga an mga travel authority in napirmahan ugsa paman umigo an bagyo ngan iba pa nga kalamidad ha rehiyon.
Samtang, hi Tourism Secretary Christina Garcia Frasco in nakadto ha London hadton Nobyembre 4 kumo mangulo han delegasyon han Pilipinas ha World Travel Market.
Ha mabalitaan an kalamidad in dayun hiya nga bumalik ha nasud kaupod an iya asawa nga hi 5th District Representative Duke Frasco, agud pangunahan an relief operations ha Cebu.
