TACLOBAN CITY – Padayon an ginbubuhat nga regular assessment han Department of Education o DepEd ha mga estudyante nga hamubo an proficiency o kulang ha learning practice, training ngan experience.
Ini in kasumpay ha nagin resulta nga ginpresentar ha Second Congressional Commission on Education o EDCOM II, nga nagawas nga 70% han mga Grade 3 pupils in dire pa maaram bumasa basar ha ginpagawas nga datos han Enero 2025.
Kaupod hini gihapon an paghamubo ha 19.56% ha proficiency han mga Grade 6 students ha ginbuhat naman nga National Achievement Test dida han 2024.
Nakita han EDCOM nga mayda mga nagtapos nga hamubo gihapon iton proficiency, kun diin usa ini nga nakikita nga rason ha paghitaas han unemployment rate ha nasud.
Ha sector han edukasyon, dako gihapon nga ayat nga ginkakaatubang hini an kakulangan han mga learning materials, classrooms, education program ngan misalignment ha subject specialization.
Kasumpay hini, nakaghipatik gihapon an DepEd Eastern Visayas nga mayda eskuylahan ha rehiyon nga mayda kaso hin hamubo ha profieciency.
Sumala kan DepEd 8 Information Officer, Jasmine Calzita nga nagpalusad an buhatan hin programa nga project stars nga kun diin target hini an mga estudyante nga tikang Kinder pa igbaw.
Panuyuan han programa in pahitaason an proficiency han mga estudyante nga nanginginahanglan hin bulig o kun diin nga area mahinay an mga ini.
Samtang pinaagi naman han programa nga nagpapadayon ha pagkayana in malinampuson naman nga napaparibhong an reading ngan numeracy skills han mga estudyante.
