TACLOBAN CITY – Ginpatapod han DepEd Regional Office-8, nga magigin hapsay an pag-aabre han face to face classes yana nga Agusto 22, 2022.
Sumala kan Jasmine Francisco Calzita, Infromation Officer han DepEd Regional Office-8, nga nagkamayda hira hin Oplan Balik Eskwela, agud nga masigurado an tanan nga mga eskwelahan, sugadman an mga magturotdo nga adman na an mga ine para ha tidaraon nga pag-aabre han klase.
Dugang pa han mao nga opisyal, nga mayda la gihapon magpapabilin ha modular blended learning partikular na ha may Maasin, Southern Leyte, kun diin naapektaran an mga classrooms matungod han nakalabay nga kalamidad, samtang maabot naman ha 45% nga mga public schools an mag-iimplementar na hin limited face to face classes ha bug-os nga Sinirangan Bisayas.
Subay ha ira datos maabot pala ha 979,000 kabug-usan nga ihap han mga nagpa-enroll nga mga estudyante para yana nga school year dinhe ha rehiyon.
Ine in 75. 24% pala kompara han nakalabay nga tuig nga umabot ha sobra 1,301,782 nga mga estudyante an nagpaenroll, ngan naglalaom naman an mao nga ahensya nga madudugangan pa an mga enrollees matungod nga batasan naman gud han mga kag-anak nga ig-eenroll an ira mga anak kun ongoing na an klase.
Nanawagan naman ine ha mga kag-anak nga maghikay na han mga requirements han ira mga anak ngan igpa-enroll na ine matungod nga andam ngan abre pa an kada-ekswelahan nga kumarawat hin mga estudyante nga makiki-usa yana nga pag-aabre han limited face to face classes mahuman an 2 katuig nga pagsuspender hine durot na gihapon han COVID-19 pandemic.
