TACLOBAN CITY – Maabot ha pira milyones kapesos an kantidad han ginbilin nga danyos han nahitabo nga sunog ha usa nga building ha Hindang National High School ha Hindang, Leyte, sobra usa kasemana san-o an utro nga pagtitikang han klase yana nga bulan.
Sumala kan SFO2 Julius Matillano, Duty Investigator han Hindang Fire Station, an mao nga building in gingagamit nga science laboratory, classroom, library ngan e-laboratory ha mao nga eskwlehan.
Kasagaran naman ha mga nasunog in mga modules, computers ngan iba pa nga mga higamit kun diin madagmit an pagsarang han kalayo.
Basar ha report, maabot ha P5.2 million an inisyal nga kantidad han danyos nga naidurot han mao nga sunog.
Ha pagkayana in padayon pa an ginbubuhat nga imbestigasyon han mga otoridad bahin han hinungdan han mao nga mga insidente.
