NATIONAL NEWS– Ginsigurado han Department of Agriculture (DA) nga makaka-karawat hin fuel subsidy an mga parupangisda ngan parag-uma nga apektado han hinay-hinay nga pagpatuman hin umento ha presyo han produktong petrolyo yana nga semana.
Sumala kan Agriculture Sec. Francisco Tiu Laurel Jr., nag-alutaga an ahensiya hin ₱150 million o tag-₱75 million nga pondo para ha fuel subsidy han mga parupangisda ngan parag-uma ha ilarom han 2025 General Appropriations Act.
Ginmalatumat naman ni Agriculture spokesperson Assistant Secretary Arnel de Mesa nga igpapagawas an pondo ha oras nga sumaka an presyo ha US$80 kada bariles han Dubai crude oil.
Posible naman dire maabat yana an epekto han conflict ha Middle East kasumpay ha presyo han mga abuno ngan maabat pa ine ngada hiton urhi nga quarter yana nga tuig.
Manunumduman, una na nga ginsigurado han opisyal nga mayda sadang nga suplay an mga abuno hiton nasud ngan ginbabana-bana nga magdudugay ine kutob ha katapusan hiton tuig.
