NATIONAL NEWS– Nag-isyu na hin notice an Department of Agriculture (DA) para papag-esplikaron an mga retailers nga dire nagsusunod hiton ginpapatuman nga maximum suggested retail price ha mga produkto han baboy ngan bugas.
Mababaruan, nga nadakop ha akto hiton departamento nga nagbabaligya la gihapon an mga ine hin mahal nga presyo tikang ha ginpapatuman nga MSRP.
Ha datos nga kapot han DA, 20% la an nag-comply ha ginpapatuman nga MSRP tikang han ig-implementar ine hadton Marso 10, 2025.
Sumala kan DA Asec. Genevieve Velicaria-Guevarra, ginsundan la han mga retailers an presyo han mga dealers ngan magin an nakakarawat nga mga deliveries.
Ha pantag naman hiton bugas, nakit-an gihapon han DA nga mayda nagbabaligya hin P52/kilo han imported premium rice nga hitaas kumpara ha ginpapatuman nga P45/kilo.
