TACLOBAN CITY – Nakipagsumpayan na an Department of Agriculture (DA) Regional Office 8 ha Department of Interior and Local Government (DILG) sugadman ha iba pa nga mga ahensya agud nga manduan an mga local government officials (LGUs) nga seryosohon ngan mas pahuguton an pagbabantay ha mga borders han ira bungto dire la ala kontra ha pagsarang han COVID-19 kundi pati na gihapon ha ginkakabarak-an nga African Swine Fever (ASF).
Una hini, ginkakaalarma han DA 8 an padayon nga pagsarang han ASF ha rehiyon kun diin upat na nga mga bungto ha Sinirangan Bisayas an apektado hini.
Sumala kan Francis Rosaroso, tagapagyakan han DA Regional Office 8, kinahanglan nga magburublig han ngatanan labi na gud an mga opisyales han kada bungto nga pahuruhuguton an pagbabantay ha mga borders tungod nga mayda la gihapon pipira ha pagkayana nga nagpapalusot hin baboy ha pakadto ha iba nga mga bungto.
Nagtutuo manggud an DA nga delikado ini nga buruhaton tungod nga bisan usa la nga baboy nga infected hin ASF an makasulod ha usa nga bungto in madagmit ini nga magsasarang.
Nahibaruan nga ha pagkayana in apektado na han ASF an mga bungto han Abuyog, Javier, La Paz ngan Dulag, Leyte.
