TACLOBAN CITY – Mahuman an sakob 100 ka-tuig, gin aprubaran na han Leyte Normal University, usa nga unibersidad ha Tacloban an pag cross dress ngan pagpasulod ha mga estudyante nga may kolor iton buhok.
Basar ha 2022 Student Handbook han unibersidad in gindederi an pag co-cross dress ngan pagpapatina han mga buhok kun diin, an hino man nga mga estudyante an madadakpan nga tumalapas hini nga balaud han unibersidad in papagbatunon.
Mahitungod hini, pinaagi han usa nga Letter of Appeal nga gin padangat han Office of the Student Regent ha Office of the University President in gin aprubaran ni LNU President Gil Nicetas Villarino, an desisyon nga bulkason na an pagdidiri ha cross dressing ngan hair color ha mga estudyante kun diin, an mao nga kamanduan in epektibo tinikangan yana nga Academic Year 2025-2026.
Sumala kan Student Regent ngan Supreme Student Council President Jon Ivan Torreros, an panuyuan hini nga pitad in tagan higayon nga ma puypoy an gender-based discrimination ha mao nga unibersidad sugad man pugngan an pag hitaas han kaso han bullying ngan harassment samtang gin huhulat an opisyal nga pag rebisa han student handbook.
Dugang pa hini, naiinitindihan han ira kampo nga damo iton nadire han pitad nga gin buhat han student regents mahitungod nga subra usa ka-siglo an nagingpag sunod han mga estudyante ngan faculty, nga kun diin nahimo na nga tradisyon han unibersidad pero pag klaro ni Torreros, ini nga pitad in diri para ha ngatanan.
Para la ini ha mga estudyante nga karuyag mag hair color ngan mag cross dress sugad hiton mga miyembro hiton LGBTQIA+ community agud mas magin confident ngan maipahayag an ira katungod ha kumunidad sugad man ig-express an ira mga kalugaringon.
Gin klaro naman ni Torreros nga bisan man kun puydi na an cross-dressing, kinahanglanon la gihapon sundon han mga estudyante an nakatalaan nga sukol han uniporme subay han student handbook. (Bombo Niña Magpili)
