NATIONAL – Gin malatumat ni COMELEC Chairman George Erwin Garcia nga plano nira magkamay-ada na gihapon hin voters registration ha gab-i. Dugang pa hine, ig iimplementa nira ine ha registration nga mahitatabo ha syahan nga adlaw han Agosto kutob ha Agosto 10.
Sumala pa kan Garcia, an mahitatabo nga Register Anytime in pagdudumaraon tikang hiton alas-7 hiton gab-i kutob alas-5 hiton aga pero ha mga pili la nga lugar.
Samtang an regular nga pagpapa-rehistro in matikang naman hiton alas-8 hiton aga kutob alas-5 hiton kulop.
Pag-abot naman ha mga mall, regular nga oras an susundon samtang ha mga airports naman in an pan-gab-i nga oras han panrehistro.
Kasumpay hine, ginklaro gihapon han komisyon nga an pagdudumaraon nga Register Anywhere Program o RAP in mag-iiha la kutob hiton Agosto 7 agud maghatag hin dalan nga maibalhin ha mga kalugaringon nga lugar an mga nagpa-rehistro.
Samtang, bisan man kun waray kahingadayi ha SONA han presidente an anuman nga maypaghisumpay ha kahuhuman la nga Midterm Elections o bisan an Barangay ngan Sangguniang Kabataan Elections, iginduon ni Garcia nga an pagkarawat ha mga bag-o nga hurar nga opisyal ngan pagkilala ha mga kabataan in nagpapakita nga nagin hapsay an piniliay.
Kasumpay hine, waray pa daw nakikita nga indikasyon an poll body nga igve-veto han presidente an balaudnon nga nag-uugsod ha Barangay ngan Sangguniang Kabataan Elections (BSKE) ha 2026 ngan nagpapahilawig han termino han mga opisyal ha upat katuig tikang ha presente nga tulo katuig.
Dugang pa hine, ginmalatumat han COMELEC nga kun igpapadayon an piniliay yana nga tuig, hira in andam pero mas makakaupay kun maiu-ugsod pa ine agud mas magin maupay an pangandaman.
