Gin pahayag ni Mamamayang Liberal party-list Representative Leila De Lima nga gumutiay na an kalibutan han mga co-perpetrator ni anay Presidente Rodrigo Duterte mahuman hira ngaranan han International Criminal Court (ICC).
Kaupod na dinhi hira Senator Ronald “Bato” Dela Rosa, Senator Bong Go, anay Justice Secretary Vitaliano Aguirre II, ngan pira panga mga opisyal han Philippine National Police (PNP).
Ha usa nga video statement nga ginpagawas, ginmalatumat hini nga hadto pa man in ginpahimatngunan na niya an mga ini, bisan pa man han nakadto pa hiya ha presohan, nga maabot an nasabi nga adlaw. Kaparehas daw han anay Presidente, waray an mga ini mamati, lugod, in naghambog pa.
Nagpahimatngon gihapon hi De Lima nga damo ha mga ini an magtatago ngan maupod kan Senador Bato nga yana in nagtatago ha balaod.
Sugadman, anuman an mahitabo, lalanaton hira han balaod ngan magdadaog an hustisya.
Syahan hini, basar ha ginpagawas nga dokumento han ICC, an pagkakalakip kanda dela Rosa ngan Go ha listahan in mahitungod ha papel ha pagpapatuman ngan pagsuporta ha mga polisiya han drug war ni anay Presidente Duterte.
Manunumduman nga hi dela Rosa an nagserbi hadto nga hepe han nasyunal police nga nanguna ha pagpapatuman han kampanya kontra ha ilegal nga droga, samtang hi Go naman an nagserbi hadto nga Special Assistant to the President (SAP).
