TACLOBAN CITY – Arestado an bugto nga babaye han usa nga PDL nga nakadetine ha Tacloban City Jail Mail Dormitory mahuman nga makuha ha iya dara nga gamit an usa ka-sachet hin heat-sealed nga marijuana.
Ginkilala iton suspek kan Angiline, 20-anyos an pangidaron.
Sumala kan J/CInsp. Gusser Gadong Sr., Jail Warden hiton Tacloban City Jail Mail Dormitory, an suspek in ginsugo la nga magdara han gamit han iya bugto tikadto naman ha dormitory han mga lalaki nga PDL kun diin dida han pagdumara han searching procedure in nakuha ha guti nga bursa han pantalon an usa ka-sachet han gin aalegar nga marijuana.
Sumala naman daw hiton suspek, dire hiya maaram nga mayda nakapiit nga marijuana ha nasabi nga pantalon mahitungod nga gin pakuha la ine han iya bugto ngan ginpadara naman ha iya.
Ha pagpakiana naman han mga otoridad ha bugto han suspek nga PDL, posible daw nga gamit ine niya dati pero nakalimtan niya nga tanggalon mahitungod nga nadakop naman ine.
Igin kasubo naman han nasabi nga opisyal an panhitabo pero bisan paman daw kun sugad in usa la gihapon ine nga pagtalapas ha balaod sanglit gin pasakahan la gihapon an suspek hin kaso nga Possession of Illegal Drugs.
