Kampante hi Tingog Partylist Rep. Jude Acidre nga waray pa mga magbabalaod nga nabawi han ira suporta kan House Speaker Faustino Dy, ha sulod han usa kasemana nga pag-aabri han 2nd Regular Session han 20th Congress.
Sumala kan Acidre, nagpapabilin nga solido an suporta han mga magbabalaod nga kaparte han 2nd Regular Session, ngan bug-os gihapon an suporta han mga ini ha policy direction han Kamara.
Ha kaluyo han nagin pahayag ni Presidente Ferdinand Marcos Jr. nga harani na pasakahan hin lul-on nga kaso an anay House Speaker, nagpapabilin la gihapon an suporta han House of Representative kan Speaker Dy, nga usa ha mga kilala nga kaalyado ni Presidente Marcos.
Manunumduman nga hi Speaker Dy an sumaliwan kan presidential cousin, Rep. Martin Romualdez, nga usa ha mga igindadabi ha nabuyagyag nga flood control scandal. Hi Speaker Dy an usa ha mga kilala nga kaalyado ngan supporter ni Presidente Marcos, sugad gihapon hadto kan Romualdez.
Sumala kan Acidre, dire apektado an House members ha nagin pahayag han Presidente kasumpay ha pagpapasaka hin mga kaso, lugod in nagpapabilin an ira pagtapod ngan suporta ha iya kaalyado nga hi Speaker Dy.
Ha presente, waray daw pagbabag-o ha policy direction han House of Representatives ngan padayon la gihapon an pag-pokus hini ha executive-legislative agenda han Marcos administration. Kaupod dinhi an tax reform programs, reporma sa power sector, education, healthcare, ngan iba pa.
