Posible sumipa an presyo han liquefied petroleum gas (LPG) ha mga masunod nga adlaw mahitungod ha utro nga paghitaas han tensyon ha Middle East.
Ginbabana-banan nga P27.50 an posible nga igdugang ha presyo han kada 11-kilogram nga LPG cylinder, o kaparehas han sobra-kulang P2 kada kilo, subay ha LPG Marketers Association (LPGMA).
Bisan man kun waray pa opisyal nga price adjustment an Department of Energy, ginmalatumat han LPGMA nga humitaas an presyo han LPG ha world market mahitungod ha nagtitikaduro nga kasamok ha Middle East.
Sumala kan LPGMA Founder ngan Chairman Arnel Ty, naapektuhan an presyo mahuman utro nga maglarab an kasamok ha butnga han Estados Unidos ngan Iran, nga nakaapekto ha global supply han LPG.
Mahitungod hini, ginmalatumat han grupo nga malabo gihapon magkamay-ada hin rollback ha presyo han LPG ha mga masunod nga bulan, labi na nga magtitikang na an winter stockpiling ha iba nga nasud.
Iginkabaraka naman ini han pira nga negosyante nga nagpahayag nga posible nira igpasa ha mga mamaralit an dugang nga gastos agud mapabilin an ira operasyon.
