TACLOBAN CITY – Naaresto han mga kapulisan ha ira gindudumara nga checkpoint operations an pira nga mga indibidwal ha probinsya han Leyte nga nakatalapas han ginpapatuman nga gunban kasumpay han nakatalaan nga midterm elections yana nga Mayo 13.
Sumala kan PSI Edgar Octaviano, han Leyte Police Provincial Office (LPPO) ha pagkayana in maabot na ha napulo nga mga short firearms, duha nga replica, explosive device, duha nga hand grenade, 278 nga ammunitions, ngan siyam nga bladed weapons an ira narekopo ha nagpapadayon nga operasyon kasumpay han COMELEC checkpoints.
Dugang pa hini nga an nagkarerekupo nga mga armas in tikang ha pira nga mga sibilyan, Bureau of Corrections personnel, retired police personnel ngan an pira naman in tikang ha mga anti-drug operations nga gindumara.
Nahibaruan nga maabot ha 15 nga mga lugar ha Leyte an gintudlok kumo areas of concern yana nga eleksyon ha ilarom han Category 1 and 2.
