TACLOBAN CITY – Usa nga Brgy. Kapitan ngan SK Official hiton Alta Vista, Ormoc City an samaran mahuman nga pamusilon hin duha nga suspek nga naka-motorsiklo.
Ginkilala an kapitan kan Dennis Laurente, barangay kapitan han Alta Vista, Ormoc City, ngan usa nga SK Official.
Sumala kan PLt. Col. Ramil Amodia, Information Officer hiton Ormoc City Police Office, nakasakay ha passenger seat han barangay multicab service hi Laurente tikadoto ha Ormoc Superdome para umatender han aktibidad para han Independence Day han tigda nga uminsima an mga naka-motor nga suspek ngan ginpamusil an kapitan.
Waray naman maigo an driver han multicab pero naigo hi Laurente ngan an SK Kagawad nga nalingkod ha luyo nga dapit han sarakyan.
Dayun naman nga umiskapo an mga suspek mahuman an insidente.
Samtang, maghahatag naman hin P200,000 nga reward money hi 4th Leyte District Congressman Richard Gomez ngan Ormoc City Mayor Lucy Torres-Gomez ha makakagtudlok han mga suspek.
